ياليل ماذكر اني في حياتي تمنيت

مثل ابتسامه تنتشل قلب منصاب

ياليل ماذكر اني في حياتي تمنيت


مليت ورب البيت ياليل مليت
من الجروح اللي تجيني بلا اسباب


تدري ياليل إني على الجرح غنيت
غنيت دمعه والصدى ضم الأهداب


تبي الحقيقه والصراحه ترجيت
فرحه ولكن الزمن بالعطا خاب


ياليل قلي بدنيتي ويش سويت
حتى الهموم بداخلي تفتح ابواب


إن كان طيبي عيب ومشكلتي أوفيت
أموت صادق وارفض أعيش كذاب


طبعي كذا عن ميزتي ماتخليت
عندي مبادي دونها ترخص رقاب


بيني وبينك ياكثر ماتعنيت
أركض بغرفه مغلقه مالها باب


غرفه وراها فرحتي دونها جيت
أركانها عتمه ولا حولي أحباب


كاس الفراق المر منه تقهويت
أنا أشهد إن الشوق ياليل غلاب


ياليل انا لا شفت ماعفت قفيت
أقفي ولو خلفي كثيرين اصحاب


إلا جروحي كل ما رحت وقفيت
جتني تحمل صدتي لوم وعتاب


ماذكر ولو مره بحياتي تهنيت
اضحك كذا والصدق عن شفتي غاب


صارت دموعي ضيف وعيوني البيت
ودايم تشوف من المناديل ترحاب



لاشفت شمس الصبح ليديك حنيت
في داخلك حبر القلم بالشقى ذاب


أسريك بالحالي وإذا رحت ونيت
مابي تروح ودمعتي بين الاهداب


ياليل قل لصبح إني تمنيت
بس أبتسامه تنتشل قلب منصاب